পাতনি :
অসমৰ ভাষা , সাহিত্য সংস্কৃতিৰ উত্তৰণত অসম সাহিত্য সভাৰ অনবদ্য অৱদানক অগ্ৰাহ্য কৰিব নোৱাৰি। ইতিহাসৰ পাতত অসম সাহিত্য সভাৰ অনবদ্য অৱদানৰ সম্পৰ্কে জলজল পটপটকৈ উজ্বলি আছে । অসমত আন ভাষাৰ আগ্ৰাসন ৰোধ কৰিবলৈ আৰু অসমীয়া ভাষাৰ উন্নতিৰ সম্পৰ্কে চিন্তা-চৰ্চা কৰিয়েই নিশ্চয় কলিকতাত পঢ়ি থকা এচাম অসমীয়া ছাত্ৰ-ছাত্ৰীয়ে অসমীয়া সাহিত্যক বিশ্বদৰবাৰত প্ৰতিষ্ঠা কৰিবৰ নিমিত্তে ১৮৮৮চনৰ ২৫ আগষ্টত "অসমীয়া ভাষাৰ উন্নতি সাধিনী সভা " গঠণ কৰিছিল। প্ৰখ্যাত সাহিত্যিক লক্ষ্মীনাথ বেজবৰুৱা, হেমচন্দ্ৰ গোস্বামী, বেনুধৰ ৰাজখোৱা,ডালিম চন্দ্ৰ বৰা, তীৰ্থনাথ শৰ্মা, কমল চন্দ্ৰ শৰ্মা আদি গণ্যমান্য ব্যক্তিসকলৰ প্ৰচেষ্টাত এই সাহিত্যৰ অনুষ্ঠানটো গঢ় লৈ উঠিছিল। এইসকল কাণ্ডাৰী পুৰুষৰ প্ৰত্যক্ষ জড়িতকৰণৰ ফলশ্ৰুতিত পৰৱৰ্তী ১৯১৭ চনৰ ২৬ ডিচেম্বৰত পদ্মনাথ গোহাঞিবৰুৱাৰ পৌৰহিত্যত অনুষ্ঠিত অধিবেশনত "অসমীয়া ভাষা উন্নতি সাধিনী সভা" ই "অসম সাহিত্য সভা " ৰূপে খ্যাত হয় যি এতিয়া লৈ সেই একেই নাম অটুট আছে।
'অসম সাহিত্য সভা'ৰ অনবদ্য অৱদানৰ সম্পৰ্কে মোৰ দৰে অভাজনৰ লিখাৰ সাধ্যৰ বাহিৰত যদিও কিছু মৰসাহ কৰি সংক্ষিপ্ত বিৱৰণেৰে লিখিবলৈ প্ৰয়াস কৰিছোঁ। ক'ৰবাত বঢ়া টুটা হ'লে সুধী সমাজে দিহা পৰামৰ্শৰে উৎসাহ যোগাব বুলি আশা কৰিলো। অসম সাহিত্য সভাৰ অনবদ্য অৱদান সম্পৰ্কে আলোচনা আগবঢ়োৱা আগতে ইয়াৰ লক্ষ্য আৰু উদ্দেশ্য কি (?) সেই বিষয়ে জনাটো নিতান্তই প্ৰয়োজন বুলি ভাবোঁ। উদ্দেশ্যৰ লগত সংগতি ৰাখি সাহিত্য সভাৰ অনবদ্য অৱদান সম্পৰ্কে আলোচনা আগবঢ়োৱা সহজ হ'ব।
উদ্দেশ্য :
অসম সাহিত্য সভাৰ সংবিধান অনুসৰি এই অনুষ্ঠানত বিভিন্ন মহৎ উদ্দেশ্য সংযোজন হৈ আছে। বিশেষকৈ অসমীয়া ভাষা, সাহিত্য আৰু সংস্কৃতিৰ সৰ্বাংগীন উন্নতি সাধন কৰাটোৱেই সভাৰ মুখ্য উদ্দেশ্য। তদুপৰি থলুৱা কৃষ্টি সংস্কৃতিক উন্নয়নৰ সুবিধা প্ৰদান কৰি সমাজক আগুৱাই নিয়াৰ এক মহৎ উদ্দেশ্য সংযুক্ত হৈ আছে। সংবিধানৰ মতে , অভিধান, ব্যাকৰণ আৰু অন্যান্য গ্ৰন্থ প্ৰণয়ন কৰা ; প্ৰাচীন সাহিত্য আৰু লোক সাহিত্যৰ অনুসন্ধান, সংগ্ৰহ, গৱেষণা আৰু প্ৰকাশ কৰা ; সংগীত, চিত্ৰবিদ্যা , ভাস্কৰ্যবিদ্যাৰ উন্নতিকল্পে কাম কৰা ; সভাৰ মুখপত্ৰ আৰু প্ৰচাৰ পত্ৰ প্ৰকাশ কৰা ; ভাষা সাহিত্য সংস্কৃতিৰ গৱেষণা কেন্দ্ৰ স্হাপন কৰা ; সাহিত্য আৰু সংস্কৃতিৰ সম্পৰ্কীয় বিনিময় আঁচনি কাৰ্যকৰী কৰা ; অসমীয়া সাহিত্যত অভাৱ হোৱা পুথিৰ প্ৰয়োজনীয়তা দূৰ কৰা ; উপযুক্ত বিবেচিত গ্ৰন্থৰ গ্ৰন্হকাৰক বঁটা প্ৰদান কৰা আৰু সামৰ্থহীন সাহিত্যিকক আৰ্থিক সাহায্য প্ৰদান কৰা আদি উদ্দেশ্য সমূহ সন্নিৱিষ্ট হৈ আছে।
অৱদানৰ সম্পৰ্কে :
১৯১৭ চনৰ পৰা শতবৰ্ষ গৰকা দিনলৈ অসম সাহিত্য সভাই সাহিত্যৰ দিশত যে বহু উন্নয়ন মূলক কাম কৰি আহিছে তাক নুই কৰিব নোৱাৰি। জাতি,বৰ্ণ , ধৰ্মৰ উৰ্দ্ধত থাকি বহু লেখকক উপযুক্ততাৰ ভিত্তিত বঁটা বাহন প্ৰদান কৰি সন্মান প্ৰদৰ্শন কৰি আহিছে। যাৰ ফলত লেখক সকল অধিক লিখাৰ বাবে উৎসাহিত হৈছে। একেদৰে সংস্কৃতিৰ সৰ্বাংগীন উন্নতিৰ কাৰণেও পৰ্যাপ্ত কাৰ্য হাতত লোৱা পৰিলক্ষিত হৈছে। ১৯৩৩ চনত সভাই এলানি গ্ৰন্থ প্ৰণয়ন সম্পৰ্কীয় কাৰ্যসূচী গ্ৰহণ কৰিছিল । সেই কাৰ্যসূচীৰ অন্তৰ্ভুক্ত হিচাপে প্ৰকাশন গোটৰ পৰা ' চন্দ্ৰকান্ত অভিধান' নামেৰে এখন বৃহৎ কলেৱৰৰ অভিধান প্ৰকাশ কৰি উলিয়ায় । পৰৱৰ্তী সময়ত অসমীয়া ভাষা সাহিত্য আৰু সংস্কৃতি সম্বন্ধীয় প্ৰায় আঢ়ৈশ খন মূল্যৱান গ্ৰন্থ প্ৰকাশ কৰাৰ লগতে 'শিশু বিশ্বকোষ' পাঁচটা খণ্ডত প্ৰকাশ কৰি উলিয়ায় অসমৰ সাহিত্যৰ ভঁৰাল টনকিয়াল কৰাত সহায় কৰে। প্ৰতিকাৰ্যকালৰ মূৰে মূৰে সভাই মুখপত্ৰ ছপা কৰি আহিছে। ইয়ে সমসাময়িক কালৰ বহু তথ্য সংৰক্ষণ কৰাত সহায় কৰিছে। আনহাতে ২০০১ চনৰ পৰা অসম সাহিত্য সভাই এলানি অসমীয়া বিষয়ত বিশ্বকোষ প্ৰকাশৰ এক অভিলাষী আচঁনি গ্ৰহণ কৰিছিল । সেই অনুসৰি সভাই বৰ্তমানলৈকে বিজ্ঞান, সাহিত্য, ইতিহাস , সমাজ আৰু সংস্কৃতিৰ বিষয়ক ৯ খন বিশ্বকোষ প্ৰকাশ কৰি উলিয়ায় সাহিত্যৰ সৌৰভ বৃদ্ধিত সহায় কৰিছে। তদূপৰি সুকুমাৰ কলা , চিকিৎসা বিজ্ঞান , সংগীত আদি বিভিন্ন বিষয়ত বিশ্বকোষ প্ৰকাশৰ কাম চলি আছে। ইতিমধ্যে বহু সাহিত্যিকক অসম সাহিত্য সভাৰ তৰফৰ পৰা সাহিত্য অকাডেমি বঁটা, আনন্দ বৰুৱা বঁটা, সাহিত্য উপত্যকা বঁটা আদি বঁটা সভাৰ জৰিয়তে প্ৰদান কৰি উপকৃত হোৱাৰ কাৰ্য সমাধা কৰিছে। বহু সাহিত্যিকক সাহিত্যিক পেঞ্চন প্ৰদান কৰি সমাজত মহৎ সৃষ্টিৰাজিৰ স্বীকৃতি দি জীয়াই থকাত অৰিহণা আগবঢ়ায়ছে। ই হ'ল সমাজৰ বাবে এটা যোগাত্মক কাৰ্যৰ দিশ ।
চিত্ৰ খন গুগলৰ পৰা লোৱা হৈছে।
সামৰণি:
আলোচনাৰ পৰা বুজিব পাৰি যে অসম সাহিত্য সভাই বৰ্তমানলৈ বহু অৱদান অসমৰ বিদ্যৎ মহলৰ বাবে আগবঢ়াই গৈছে। সেয়ে অসম সাহিত্য সভা সাম্প্ৰতিক সময়ত এক গুৰুত্বপূৰ্ণ অনুষ্ঠান হিচাপে পৰিগণিত আৰু প্ৰতিজন অসমীয়াৰ হিয়াৰ আমঠু। অসমীয়া সংস্কৃতিৰ উত্তৰণৰ অন্যতম মঞ্চ।
২০০০ বৰ্ষৰ পাছৰ পৰাই যেন অসম সাহিত্য সভাৰ ভাৱমূৰ্তিত কিছু হ'লেও কালিমা পৰিছে। অপ্ৰিয় হ'লেও সত্য যে বৰ্তমান সময়ত অসম সাহিত্য সভা কেৱল ধনীক শ্ৰেণীৰ ধনঘটা আহিলাৰ সদৃশ হৈ পৰা যেন পৰিলক্ষিত হৈছে। দৰিদ্ৰ পিছপৰা লোকসলক যেন সাহিত্যিক শব্দৰে সাঙুৰি লবলৈ কিছু কুণ্ঠাবোধ কৰা যেন অনুভৱ হয় । সি যি কি নহওঁক, অসম সাহিত্য সভাৰ বহু কৰণীয় এতিয়াও আছে। নৱ প্ৰজন্মক সাহিত্যৰ ক্ষেত্ৰত আগবাঢ়ি যোৱাত অধিক উৎসাহ জগাওক , অধিক জনপ্ৰিয় হোৱাৰ বাবে কাম কৰক, ন লেখাৰুক পাৰিলে প্ৰশিক্ষণ দিয়াক যাতে অসমত অধিক লেখকৰ সৃষ্টি হয় । ইয়ে অসমৰ জনগণৰ মণত অসম সাহিত্য সভাৰ প্ৰতি আপোন মনোভাৱ জগাই তুলিব।
---------++++++---------+++++++--------------
