কুকুৰা পালন এক লাভজনক ব্যৱসায় ।

 কুকুৰা পালন :

    সাম্প্ৰতিক সময়ত কুকুৰা পালন এক লাভজনক ব্যৱসায় হিচাপে পৰিগণিত হৈছে। মানুহৰ দৈনন্দিন খাদ্য তালিকাত কুকুৰা মাংসৰ স্থান আগত। হোটেল বিলাকতো গ্ৰাহকৰ প্ৰথম পচন্দৰ কুকুৰা মাংস অনবৰতে পোৱা যায়।  বজাৰত কুকুৰা মাংসৰ চাহিদা প্ৰতিদিনে বৃদ্ধি পাব ধৰিছে। এই চাহিদাৰ প্ৰতি লক্ষ্য ৰাখি কুকুৰা পালন কৰি অৰ্থনৈতিক ভাৱে স্বাৱলম্বী হ'ব পৰা যায়। 

    অসমৰ জলবায়ু কুকুৰা পালনৰ বাবে উপযুক্ত। কুকুৰাৰ বাবে কিছু শুকান আৰু অলপ সেমেকা ঠাই হ'লে ভাল। অসমৰ লগতে সমগ্ৰ ভাৰততে বহু শিক্ষিত নিৱনুৱাই কুকুৰা পালনৰ কাৰ্যত নিজকে জড়িত কৰি আয় কৰি আছে। অৱশ্যে ইয়াৰ বাবে মুলধনৰ কথাটো সাঙুৰ খাই আছে। চৰকাৰে এই ক্ষেত্ৰত আৰ্থিক সাহায্য নিৱনুৱাক প্ৰদান কৰিব লাগিব।

কিদৰে লাভৱান হব পাৰি ?

কুকুৰা পাম খুলি কুকুৰা পোহি লাভৱান হব পাৰি। কুকুৰাৰ কণী আৰু মাংসৰ বৰ্তমান বজাৰত অতি চাহিদাপূৰ্ণ দ্ৰব্য হিচাপে পৰিগণিত হৈছে। নিতৌ মানুহৰ বাবে কণী আৰু কুকুৰা মাংসৰ প্ৰয়োজন হয়। দিনক দিনে ইয়াৰ চাহিদা বৃদ্ধি পাব ধৰিছে। বৰ্তমান বজাৰত প্ৰতি কিলোগ্ৰাম কুকুৰা (স্হানীয়)ৰ মূল্য ৩০০-- ৩৫০ টকা আৰু বইলাৰ কুকুৰাৰ প্ৰতি কিলোগ্ৰামৰ মূল্য ২০০-- ২৭০ টকা দৰত বিক্ৰী হৈ আছে। ইয়াৰ কণীৰ পৰাও সমানে লাভৱান হব পৰা যায়। স্হানীয় ভাৱে প্ৰাপ্ত কুকুৰাই এটা কণী পাৰা কালত ২০ ৰ পৰা ৪০ টালৈ কণী পাৰে। আনহাতে কামৰূপা প্ৰজাতিৰ মাইকী কুকুৰা বিলাকে এটা কণী দিয়া কালত প্ৰায় ১২০ ৰ পৰা ১৪০ টা পৰ্যন্ত কণী দিয়ে। গতিকে ইয়াৰ কণী বিক্ৰী কৰিও আয় কৰিব পৰা যায়। বৰ্তমান বজাৰত এটা স্হানীয় কুকুৰাৰ কণী দাম ৫--১০ টকা পৰ্যন্ত হয়। আনহাতে ব্ৰইলাৰ কণীৰ দাম প্ৰতি এটাত ৫ -৭ টকা । 

কুকুৰা মাংসত থকা উপাদান

কুকুৰা মাংস পুষ্টিকৰ খাদ্য হিচাপে বিবেচিত। ইয়াত কেইবাটাও প্ৰয়োজনীয় উপাদান থাকে। কুকুৰা মাংস শক্তিদায়ক হোৱাৰ বাবে ইয়াৰ চাহিদাও বেছি। মানুহৰ শৰীৰৰ বাবে যিবোৰ উপাদানৰ অতিকৈ প্ৰয়োজন হয় তাৰ সৰহ ভাগেই মাংসত নিহিত থাকে। শতকৰা হিচাপত কুকুৰা মাংসত নিহিত থকা উপাদান সমুহ এনেধৰণৰ--

প্ৰ'টিন --প্ৰায় ৭ গ্ৰাম বা ১২ ভাগ ।

স্নেহ জাতীয় পদাৰ্থ -- ৬ গ্ৰাম (প্ৰায়) বা ১১ ভাগ ।

শৰ্কৰা থাকে -- ০•৮ গ্ৰাম বা ২ ভাগ ।

ভিটামিন -- A, D, K, E  

শক্তিৰ পৰিমাণ -- ৮৫ কেলৰি  থাকে। তদুপৰি থায়োমিন, বিবোফ্লেভিন , পেণ্টথোমক এচিড, নায়োচিন, ফলিক এচিড, পাইৰিদক্সিন , বায়োটিন , চাইনোকোবালমিন আদি সুষম অৱস্থাত পোৱা যায়। 

    মাংসত থকা এমাইন এচিডৰ বাবে দেহে হজমী শক্তি লাভ কৰে। ইয়াৰোপৰি ফেটিএচিড পৰ্যাপ্ত পৰিমাণে থাকে । খনিজ পদাৰ্থৰ ভিতৰত -- কেলচিয়াম , ফছফৰাছ, আইৰণ, জিংক আদি যথেষ্ট পৰিমাণে মাংসত নিহিত থাকে। উল্লেখ্য যে এজন পূৰ্ণবয়স্ক লোকক শক্তিৰ প্ৰয়োজন হয় শতকৰা হিচাপত কেৱল ৩-৪ ভাগহে মাথোন। কিন্তু কুকুৰাৰ মাংসত শক্তি নিহিত থাকে ৮৫ কেলৰি। গতিকে মানুহৰ শৰীৰৰ শক্তি বিকাশ আৰু বৃদ্ধিৰ বাবে কুকুৰা মাংস শক্তিদায়ক আৰু পুষ্টিকাৰক আহাৰ হিছাপে চিহ্নিত।

কুকুৰা জাত বা সঁচ -- দেশী বা বিদেশী ::

গ্ৰাম্য সমাজত পোহা কুকুৰা বিধক স্হানীয় কুকুৰা বা Local cock হিচাপে জনা যায়। ভাৰতৰ বিভিন্ন প্ৰান্তত ভিন্ ভিন্ জাতৰ দেশী বিদেশী কুকুৰা পোৱা যায়। কুকুৰা জাত বোৰ হ'ল-- হোৱাইট লেগ হৰ্ণ (white leghorn) , ৰোড্ আইলেণ্ড ৰেড্ (Rhode Island Red ) , অষ্টালৰ্প (Australarp) আদি। বৰ্তমান 'কামৰূপা' নামৰ কুকুৰা জাতৰ বৰ জনপ্ৰিয় হৈছে বুলি জনা যায়। জনপ্ৰিয়তা বৃদ্ধি হোৱাৰ কাৰণ হৈছে ইয়াৰ কণীৰ উৎপাদন ক্ষমতা। এই কুকুৰা প্ৰজাতিয়ে মুঠ কণী পাৰে ১২২ টালৈকে। কণীৰ উৎপাদনৰ জৰিয়তে যথেষ্ট আয় কৰিব পাৰি। 

লবলগীয়া ব্যৱস্থা বা যতন

      প্ৰথমতে,   কুকুৰা ৰাখিবৰ বাবে গৃহ নিৰ্মাণ কৰিবলগীয়া ঠাই ডোখৰ ওখ হ'ব লাগে।যাতে বৰষুণৰ পানী, দানাৰ লগত দিয়া পানী সহজে বাগৰি যায় আৰু বোকাময় পৰিস্থিতি সৃষ্টি নহয়। দ্বিতীয়তে, কুকুৰা ৰখা মজিয়া সদায় পৰিষ্কাৰ কৰি ৰাখিব লাগে। তৃতীয়তে, কুকুৰাক যথেষ্ট পৰিমাণে সুষম আহাৰ দিয়া দৰকাৰ। চতুৰ্থতে, কুকুৰাক দানা পাত্ৰ বা আন ঠাইবোৰ চাফা কৰি ৰাখিব লাগে। পঞ্চমতে, পানীৰ যোগানৰ ব্যৱস্থা, বিজুলী চাকি আদিৰ ব্যৱস্থা থাকিলে ভাল হয়। ইয়াৰোপৰি দানা হিচাপে ধান, চাউল, গোমধান, চানা, পাকঘৰৰ পেলনীয়া সামগ্ৰী ভাত, দাইল, মাছ, মাছৰ পেটু আদি খাব দিব লাগে। বিশেষকৈ আৱদ্ধ প্ৰক্ৰিয়াৰে পোহা কুকুৰাক দানা দিয়াৰ ক্ষেত্ৰত সু-ব্যৱস্থা লবলগীয়া হয়। মুকলি পদ্ধতিৰে পোহা কুকুৰাই হাবিৰ ঘাঁহ, বন, পোক, পতঙ্গ আদি খাবলৈ পায় । গতিকে ইহঁতৰ বেছি দানা প্ৰয়োজন নহয়।

কুকুৰা পালনৰ পদ্ধতি

     কুকুৰা পালনৰ পদ্ধতি দুটা আছে। প্ৰথমটো হল মুকলি পদ্ধতি ( Open System) , দ্বিতীয়টো পদ্ধতি হ'ল ডিপলিটাৰ পদ্ধতি ( Deeplitter System) । 

    মুকলি পদ্ধতি বা Open System হ'ল মুকলিমুৰীয়াকৈ কুকুৰা পালন কৰা। অৰ্থাৎ গোটেই দিনটো বাহিত চৰিবলৈ মুকলি কৰি দি ৰাতিটো গড়ালত ৰখাৰ ব্যৱস্থা কৰা। এই পদ্ধতিত কুকুৰা বিলাকে বিভিন্ন পোক পতঙ্গ, বন , পেলনীয়া সামগ্ৰী আদি খাদ্য হিচাপে ভক্ষণ কৰাৰ সুযোগ পায়। দৌৰি ফুৰা বা লৰচৰ কৰি ফুৰা বাবে কুকুৰা বিলাকৰ মাংস আঁতিয়াল হয় আৰু চৰ্বি কম থাকে। ফলত খাবলৈ মাংস অতি সুস্বাদু হয়। এনে মাংস অধিক শক্তি সমৃদ্ধ হয়।

   ডিপলিটাৰ পদ্ধতি বা Deeplitter System হ'ল অনবৰতে অৰ্থাৎ ৰাতি আৰু দিনৰ সকলো সময়তে গড়ালত আৱদ্ধ কৰি ৰাখি পালন কৰা পদ্ধতি । এনে ধৰণৰ পদ্ধতিৰে পোহা কুকুৰা সদায় অধিক চৰ্বি যুক্ত হোৱা দেখা যায়। সেয়েহে ইয়াৰ মাংসও আঁতিয়াল নহয়। চৰ্বি থকা বাবে মাংসখিনি অতিপাত তেলীয়া হয় । 

কুকুৰা হ'ব পৰা ৰোগ

     কুকুৰাৰ সাধাৰণতে বাৰিষা কালছোৱাত বিভিন্ন ৰোগৰ প্ৰাদুৰ্ভাৱ হয়। এনে সময়ত কুকুৰা বোৰ পানী খোৱাৰ পাছত চূণৰ দৰে শৌচ কৰে আৰু কেইদিনমানৰ পিছত মৰি থাকে। বিশেষকৈ গ্ৰাম্য সমাজত এই ৰোগ বেচিকৈ দেখা যায়। মুকলি পদ্ধতিৰে পোহা কুকুৰা এনে বেমাৰত সহজে আক্ৰান্ত হয়। ইয়াৰ উপৰি কুকুৰাৰ দেহত হোৱা ৰোগ সমূহ হ'ল-- ৰাণী খেত (Ranikhet) , ককছি ডিয়ছিছ (Coccidiosis) , কৃমিজনিত ৰোগ (Worm Diseases)  আদিয়েই প্ৰধান ।

কুকুৰাৰ ঔষধ

আজিকালি কুকুৰাৰ ঔষধ প্ৰতিটো ফাৰ্মাছিত উপলব্ধ। কুকুৰাক খুব কম বয়সতে ছিটা বেজী দিয়া প্ৰয়োজন। ইয়াৰোপৰি বিভিন্ন ৰোগ হ'লে চিকিৎসকৰ পৰামৰ্শ মতে ঔষধ ব্যৱহাৰ কৰিব লাগে।

সামৰণি

 ফাৰ্মৰে হঁওক বা লোকেল কুকুৰাই হঁওক কুকুৰাৰ মাংস অতি পুষ্টিদায়ক দ্ৰব্য আৰু ইয়াৰ কণী গুণসম্পন্ন আৰু ভিটামিন যুক্ত। সেয়ে আমি কুকুৰা মাংস খাব লাগে। আৰ্থিক ভাৱে উপকৃত হ'বৰ বাবে কুকুৰা বৈজ্ঞানিক পদ্ধতিৰে পালন কৰিবলৈ আমি সকলোৱে আগবাঢ়ি আহিব লাগিব। তেহে নিজৰ লগতে দহৰ আৰু দেশৰ অৰ্থনৈতিক উন্নয়নত অৰিহণা আগবঢ়োৱা হ'ব।