মুখ্যমন্ত্ৰী লোক সেৱক আৰোগ্য যোজনা (MMLSAY): অসম চৰকাৰৰ এক যুগান্তকাৰী নগদ বিহীন স্বাস্থ্য বীমা আঁচনি
অসম চৰকাৰৰ মুখ্যমন্ত্রী লোক সেৱক আৰোগ্য যোজনা (MMLSAY) বৰ্তমান ৰাজ্যখনৰ চৰকাৰী কৰ্মচাৰী আৰু পেঞ্চনাৰসকলৰ মাজত আটাইতকৈ চৰ্চিত আৰু গুৰুত্বপূৰ্ণ বিষয় হৈ পৰিছে।
পূৰ্বৰ জটিল চিকিৎসা ব্যয় ঘূৰাই পোৱা (Reimbursement) প্ৰক্ৰিয়াৰ সলনি নগদবিহীন বা কেচলেচ (Cashless) চিকিৎসা সেৱা লাভ কৰাৰ বাবে এই আঁচনিয়ে কৰ্মচাৰী সমাজলৈ এক বৃহৎ সকাহ কঢ়িয়াই আনিছে। যদি আপুনি আপোনাৰ নগদ বিহীন চিকিৎসা সেৱা লাভৰ বাবে ইয়াৰ বিষয়ে বিতং তথ্য বিচাৰিছে, তেন্তে এই প্ৰৱন্ধটোৱে নিশ্চয় আপোনাক সহায় কৰিব।
✍️মুখ্যমন্ত্রী লোক সেৱক আৰোগ্য যোজনা (MMLSAY) কি ?
মুখ্যমন্ত্রী লোক সেৱক আৰোগ্য যোজনা (MMLSAY) হৈছে অসম চৰকাৰৰ স্বাস্থ্য আৰু পৰিয়াল কল্যাণ বিভাগৰ অধীনত পৰিচালিত এক অভিলাষী স্বাস্থ্য বীমা আঁচনি। ইয়াৰ মুখ্য উদ্দেশ্য হ'ল অসম চৰকাৰৰ কাৰ্যৰত কৰ্মচাৰী, পেঞ্চনাৰ আৰু তেওঁলোকৰ নিৰ্ভৰশীল পৰিয়ালৰ সদস্যসকলক উন্নত মানদণ্ডৰ চিকিৎসা সেৱা সহজতে প্ৰদান কৰা।
পূৰ্বতে চৰকাৰী কৰ্মচাৰীসকলে চিকিৎসাৰ পিছত বিল জমা দি টকা ঘূৰাই পাবলৈ মাহৰ পিছত মাহ অপেক্ষা কৰিবলগীয়া হৈছিল। কিন্তু এই আঁচনিয়ে সমগ্ৰ প্ৰক্ৰিয়াটোক সৰল আৰু ডিজিটেল কৰি তুলিছে।
✍️MMLSAY-ৰ মূল বৈশিষ্ট্য আৰু লাভসমূহ :
এই আঁচনিৰ অধীনত হিতাধিকাৰীসকলে কেইবাটাও গুৰুত্বপূৰ্ণ সুবিধা লাভ কৰে:
ক) ৫ লাখ টকালৈকে কেচলেচ (Cashless) চিকিৎসা লাভ : প্ৰতিটো পঞ্জীভুক্ত পৰিয়ালে বছৰি সৰ্বাধিক ৫ লাখ টকালৈকে নগদবিহীন চিকিৎসা সেৱা লাভ কৰিব পাৰে। অৰ্থাৎ চিকিৎসালয়ত ভৰ্তি হ'লে জেপৰ পৰা পইচা নিদিয়াকৈয়ে চিকিৎসা সেৱা সম্ভৱ হয়।
খ) সমগ্ৰ ভাৰতবৰ্ষত চিকিৎসাৰ সুবিধা : কেৱল অসমতে নহয়, এই আঁচনিৰ অধীনত অসমৰ বাহিৰৰো বহুকেইখন নামী-দামী তালিকাভুক্ত (Empanelled) হাস্পতালত চিকিৎসা সেৱা গ্ৰহণ কৰিব পাৰি। সেইবোৰ হৈছে -
✍️দিল্লী আৰু NCR (National Capital Region) অঞ্চলত
👉Medanta – The Medicity: গুৰুগ্ৰাম (Gurugram)
👉Max Super Speciality Hospital : দিল্লীৰ বিভিন্ন ইউনিট বিলাকত।
👉BLK-Max Super Speciality Hospital : নতুন দিল্লী
👉Jaypee Hospital / Jaypee Healthcare: নয়ডা (Noida)
✍️উত্তৰ প্ৰদেশ আৰু উত্তৰ ভাৰতত -
👉Medanta Hospital: লক্ষ্ণৌ (Lucknow) আৰু নয়ডা ইউনিট
👉Max Super Speciality Hospital: লক্ষ্ণৌ (উত্তৰ প্ৰদেশ), ডেৰাডুন (উত্তৰাখণ্ড) আৰু বাথিন্দা (পঞ্জাব)
✍️মহাৰাষ্ট্ৰ (মুম্বাই)ত-
👉Nanavati Max Super Speciality Hospital: মুম্বাই
✍️অসমৰ অন্তৰ্ভূক্ত চৰকাৰী চিকিৎসালয় তথা মহাবিদ্যালয় সমূহ আৰু বিভিন্ন বেচৰকাৰী নাৰ্চিং হোমতো এই আচঁনি উপলব্ধ।
গ) চেণ্ট্ৰেল জি এইচ এছ (CGHS) দৰমহাৰ হাৰ : কেন্দ্ৰীয় চৰকাৰৰ স্বাস্থ্য আঁচনি (CGHS)ৰ নিৰ্ধাৰিত দৰমহাৰ হাৰ অনুসৰি ইয়াত চিকিৎসাৰ খৰচ বহন কৰা হয়, যাৰ ফলত হিতাধিকাৰীসকলে সঠিক মূল্যত উন্নত চিকিৎসা পায়।
ঘ) সহজ ডিজিটেল প্ৰক্ৰিয়া : আঁচনিখনৰ অধীনত প্ৰতিগৰাকী হিতাধিকাৰীক এক নিৰ্দিষ্ট হেল্থ কাৰ্ড (Health Card) প্ৰদান কৰা হয়, যাৰ জৰিয়তে চিকিৎসালয়ত প্ৰৱেশ কৰিয়েই সুবিধা ল'ব পাৰি।
✍️আঁচনিখন বৰ্তমান কিয় ট্ৰেণ্ডত আছে ?
বৰ্তমান সময়ত MMLSAY সংবাদ মাধ্যম আৰু ছচিয়েল মিডিয়াত অতিশয় সক্ৰিয় হৈ থকাৰ কাৰণসমূহ তলত দিয়া ধৰণৰ:
ক) কেচলেচ (Cashless) সেৱাৰ পূৰ্ণাংগ শুভাৰম্ভ
আঁচনিখন প্ৰথমাৱস্থাত কেৱল ৰিইম্বাৰ্চমেণ্ট (Reimbursement) মডেলত চলি আছিল যদিও, চৰকাৰে শেহতীয়াকৈ ইয়াক সম্পূৰ্ণ নগদ বিহীন ৰূপলৈ ৰূপান্তৰ কৰিছে। বৰ্তমান নেটৱৰ্ক চিকিৎসালয় সমূহত ই-কাৰ্ড দেখুৱাই চিকিৎসা কৰাটো সম্ভৱ হৈ উঠিছে।
খ) পেণ্ডিং ক্লেইম বাতিলৰ জৰুৰী জাননী :
অটল অমৃত অভিযান ছ'চাইটীৰ (AAAS) তৰফৰ পৰা শেহতীয়াকৈ এক গুৰুত্বপূৰ্ণ নিৰ্দেশনা জাৰি কৰা হৈছে। যিসকল কৰ্মচাৰী বা পেঞ্চনাৰৰ পূৰ্বৰ চিকিৎসা ব্যয়ৰ ক্লেইম আবেদনসমূহ যাৱতীয় নথিপত্ৰৰ অভাৱত এবছৰ বা ততোধিক সময় ধৰি 'পেন্দিং' (Pending) হৈ আছে, তেওঁলোকক অতি সোনকালে নথিপত্ৰ আপলোড কৰিবলৈ কোৱা হৈছে। অন্যথা এই ক্লেইমসমূহ স্থায়ীভাৱে বাতিল কৰা হ'ব।
গ) নতুন পঞ্জীয়ন আৰু হেল্থ কাৰ্ড বিতৰণ :
ৰাজ্যৰ বিভিন্ন চৰকাৰী বিভাগসমূহত এতিয়াও হেল্থ কাৰ্ড বিতৰণ আৰু নতুনকৈ নাম অন্তৰ্ভুক্ত কৰাৰ প্ৰক্ৰিয়া দ্ৰুতগতিত চলি আছে। যাৰ বাবে কৰ্মচাৰীসকলৰ মাজত ইয়াৰ ব্যৱহাৰ আৰু সজাগতা ব্যাপক হাৰত বৃদ্ধি পাইছে।
✍️আঁচনিখনৰ বাবে যোগ্যতা (Eligibility Criteria) কি?
MMLSAY-ৰ সুবিধা কোনে কোনে লাভ কৰিব পাৰিব ?👇
i/ অসম চৰকাৰৰ সকলো কাৰ্যৰত নিয়মীয়া কৰ্মচাৰী।
ii/ অসম চৰকাৰৰ সকলো ৰাজ্যিক পেঞ্চনাৰ।
iii/ কৰ্মচাৰী বা পেঞ্চনাৰগৰাকীৰ ওপৰত সম্পূৰ্ণৰূপে নিৰ্ভৰশীল পৰিয়ালৰ সদস্যসকল (যেনে- স্বামী/স্ত্ৰী, সন্তান আৰু আশ্ৰিত পিতৃ-মাতৃ)।
✍️ কেনেকৈ পঞ্জীয়ন কৰিব ? (Registration Process):
যদি কোনোবাই এতিয়াও পঞ্জীয়ন কৰা নাই, তেন্তে তেওঁলোকে অফিচিয়েল পৰ্টেলৰ জৰিয়তে তলত দিয়া ধৰণে আবেদন কৰিব পাৰিব :
👉 ৱেবছাইট খোলক : প্ৰথমে মুখ্যমন্ত্রী লোক সেৱক আৰোগ্য যোজনাৰ অফিচিয়েল পৰ্টেললৈ যাব লাগিব।
👉 নথিপত্ৰ প্ৰস্তুতকৰণ : পঞ্জীয়নৰ বাবে কৰ্মচাৰীৰ ID (Employee ID/PPO Number), পেন কাৰ্ড, আধাৰ কাৰ্ড, আৰু পৰিয়ালৰ সদস্যসকলৰ ফটো প্ৰয়োজন হ'ব।
👉 ফৰ্ম পূৰণ : অনলাইন ফৰ্মখনত নিজৰ চাকৰিৰ সবিশেষ আৰু পৰিয়ালৰ তথ্য নিখুঁতভাৱে পূৰণ কৰিব লাগিব।
👉ভেৰিফিকেচন আৰু অনুমোদন : আপলোড কৰা নথিপত্ৰসমূহ বিভাগীয় কৰ্তৃপক্ষই পৰীক্ষা কৰাৰ পিছত আপোনাৰ ই-কাৰ্ড (E-Card) জেনেৰেট হ'ব, যাৰ প্ৰিণ্টআউট আপুনি উলিয়াই ল'ব পাৰিব।
✍️কি কি ৰোগৰ ক্ষেত্ৰত প্ৰযোজ্য ?
ক) হৃদৰোগ (Cardiology & Cardiac Surgery) ক্ষেত্ৰত :
👉হাৰ্ট এটেকৰ জৰুৰীকালীন চিকিৎসা।
👉ক’ৰ’নাৰী এনজিঅ’প্লাষ্টি আৰু ষ্টেণ্ট (Stent)
বহুওৱা।
👉বাইপাছ চাৰ্জাৰী (CABG)।
👉পেচমেকাৰ (Pacemaker) সংৰোপণ।
খ) কেন্সাৰ বা কৰ্কট ৰোগৰ (Oncology) ক্ষেত্ৰত :
👉 অসম কেন্সাৰ কেয়াৰ ফাউণ্ডেশ্যন (ACCF)আৰু অন্যান্য হাস্পতালত কৰা সকলো ধৰণৰ কেন্সাৰ চিকিৎসা।
👉কেমোথেৰাপী (Chemotherapy) আৰু ৰেডিয়েশ্যন থেৰাপী (Radiation Therapy)।
👉 কেন্সাৰ টিউমাৰ আঁতৰাবলৈ কৰা অস্ত্ৰোপচাৰ (Surgical Oncology)।
গ) বৃক্ক বা কিডনীৰ ৰোগ (Nephrology & Urology):
👉 দীৰ্ঘম্যাদী কিডনী বিকলতাৰ বাবে প্ৰয়োজনীয় ডায়ালাইচিছ (Dialysis)।
👉 কিডনীৰ পাথৰ (Kidney Stones) আঁতৰোৱা চিকিৎসা।
👉 কিডনী সংৰোপণ (Renal Transplant)।
ঘ) স্নায়ু আৰু মগজুৰ ৰোগ (Neurology & Neurosurgery)
👉 মগজুৰ টিউমাৰ (Brain Tumor) ৰ অস্ত্ৰোপচাৰ
👉 ষ্ট্ৰোক (Stroke) আৰু ব্ৰেইন ট্ৰমা (Trauma
Craniotomy) ৰ জৰুৰীকালীন চিকিৎসা।
👉 মেৰুদণ্ডৰ (Spine) জটিল অস্ত্ৰোপচাৰ。
ঙ) হাড় আৰু জোৰাৰ ৰোগ (Orthopedics) :
👉 ফ্ৰেক্সাৰ বা হাৰ ভঙাৰ জৰুৰীকালীন প্লাষ্টাৰ আৰু অস্ত্ৰোপচাৰ।
👉 আঁঠু আৰু কঁকালৰ গাঁঠি সলনি কৰা (Knee &
Hip Replacement) অস্ত্ৰোপচাৰ।
👉 স্পাইনেল ফিউজন (Spinal Fusion)।
চ) সাধাৰণ আৰু অন্যান্য জটিল অস্ত্ৰোপচাৰ (General & GI Surgery) :
👉 এপেণ্ডিক্স (Appendicitis), গলব্লাডাৰৰ পাথৰ (Cholecystectomy) আৰু হাৰ্নিয়া (Hernia) ৰ অস্ত্ৰোপচাৰ।
👉 স্তনৰ টিউমাৰ বা ৰেডিকেল মেষ্টেকটমী (Mastectomy)।
👉 প্ৰসূতি আৰু স্ত্ৰীৰোগ সংক্ৰান্তীয় জটিলতা (গৰ্ভধাৰণ আৰু চিজাৰিয়ান প্ৰসৱ)।
ছ) চকু আৰু নাক-কাণ-ডিঙিৰ ৰোগ (Ophthalmology & ENT) :
👉 চকুৰ কটাৰেক্ট বা চকুৰ ছানি পৰা ৰোগৰ
অস্ত্ৰোপচাৰ।
👉 কৰ্নিয়া সংৰোপণ (Corneal Grafting)।
👉 কাণৰ পৰ্দা ভাল কৰা (Tympanoplasty) আদি
অস্ত্ৰোপচাৰ।
✍️ কি কি বস্তু আঁচনিৰ অধীনত কভাৰ নহয়? (Exclusions)
👉 কেৱল হাস্পতালত ভৰ্তি (In-patient/Hospitalization) হৈ কৰা চিকিৎসাৰ ক্ষেত্ৰতহে এই আঁচনি প্ৰযোজ্য।
👉 হাস্পতালত ভৰ্তি নোহোৱাকৈ ওলাই থাকি কৰা সাধাৰণ ও পি ডি (OPD) খৰচ, ডাক্তৰৰ ভিজিট আদি ইয়াত অন্তৰ্ভুক্ত নহয়।
👉 কোনো ধৰণৰ ওলোৱা-সোমোৱা স্বাস্থ্য পৰীক্ষা (Routine Health Check-up) বা কছমেটিক/সৌন্দৰ্য বৰ্ধনকাৰী চাৰ্জাৰীৰ খৰচ আঁচনিয়ে বহন নকৰে।
ঝ) সামৰণি
মুখ্যমন্ত্রী লোক সেৱক আৰোগ্য যোজনা (MMLSAY) কেৱল এখন স্বাস্থ্য আঁচনিয়েই নহয়, ই অসমৰ লাখ লাখ চৰকাৰী কৰ্মচাৰী পৰিয়ালৰ বাবে এক ডাঙৰ অৰ্থনৈতিক সুৰক্ষা কৱচ। স্বাস্থ্য সংকটৰ সময়ত যাতে কোনো চৰকাৰী কৰ্মচাৰীয়ে ধনৰ অভাৱত উন্নত চিকিৎসাৰ পৰা বঞ্চিত হ'বলগীয়া নহয়, চৰকাৰে এই আঁচনিৰ জৰিয়তে তাকেই নিশ্চিত কৰিছে। বৰ্তমান চলি থকা কেচলেচ ব্যৱস্থা আৰু ক্লেইম সম্পৰ্কীয় নতুন নিয়মসমূহৰ বাবে কৰ্মচাৰীসকলে নিজৰ কাৰ্ড আৰু ক্লেইমসমূহ সক্ৰিয় কৰি ৰখাটো অতি জৰুৰী।