বৰ্তমান সময়ত কলাগুৰু বিষ্ণুপ্ৰসাদ ৰাভাৰ প্ৰাসঙ্গিকতা ।

      কলাগুৰু বিষ্ণুপ্ৰসাদ ৰাভা কেৱল এটা নাম নহয়,ই এটা বৃহৎ অনুষ্ঠানৰ সদৃশ। অসমৰ প্ৰান্তে প্ৰান্তে ভ্ৰমি ফুৰি অসমৰ কৃষকক, আলৈ আথানি হোৱা দৰিদ্ৰ জনক স্নেহ আৰু মমতাৰে উদ্ধাৰ কৰিবলৈ নিজক উচৰ্গা কৰা বীৰ সংগ্ৰামী তথা কবি, সাহিত্যিক, নাট্যকাৰ, সংগীতজ্ঞ, চিত্ৰকৰ, নৃত্যবিদ, অভিনেতা,সংগঠক জনেই হৈছে বিষ্ণুপ্ৰসাদ ৰাভা। অসমৰ অতি শ্ৰদ্ধাৰ বিপ্লৱী সৈনিক গৰাকীৰ জন্ম হৈছিল ১৯০৯ চনৰ ৩১ জানুৱাৰীত । পিতৃ 

গোপাল চন্দ্ৰ ৰাভা আৰু মাতৃ আছিল গেথীবালা ৰাভা।

     বিষ্ণুপ্ৰসাদ ৰাভা জীৱনকালতে এক জীৱন্ত কিংবদন্তীত পৰিণত হৈছিল। ৰাভাৰ নৃত্যত বিমুগ্ধ হৈ তৎকালীন সময়ৰ হিন্দু বিশ্ববিদ্যালয়ৰ উপাচাৰ্য সৰ্বপল্লী ৰাধাকৃষ্ণনে তেখেতক 'কলাগুৰু' উপাধি প্ৰদান কৰিছিল। এয়া আছিল তেখেতৰ বাবে লগতে অসমৰ বাবে নৃত্যৰ স্তৰত জনোৱা বিৰল সন্মান। ইতিহাসৰ পাতত লিপিবদ্ধ তেখেতৰ কৰ্মৰাজীয়ে আজিও অসমৰ প্ৰতিজন লোককেই আকৰ্ষিত কৰে। আনকি প্ৰতি জন লোকে ইয়াৰ পৰা কৰ্ম প্ৰেৰণা লাভ কৰে। এই মহান শিল্পী গৰাকী বিভিন্ন দিশত পাকৈত আছিল। সংস্কৃতিৰ পথাৰখন চহোৱাত তেওঁৰ আছিল বলিষ্ঠ পদক্ষেপ। সংগীত, নৃত্য, চিত্ৰকলা, আৰু অভিনয়ৰ উপৰি সংগীত পৰিচালক হিচাপে আৰু কথাছবি পৰিচালক হিচাপেও কাম কৰি নিজৰ দক্ষতাৰ প্ৰমাণ দিছিল। তেখেতে বহু সংগীত ৰচনা কৰি অসমৰ সংগীতৰ ভঁৰাল চহকী কৰি গৈছে। ইয়াতে ৰাভাৰ দ্বাৰা ৰচিত গীতসমূহ সন্নিৱিষ্ট কৰিলোঁ।-

মোৰ কবিতাৰ ছন্দ লাগি,

পৰজনমৰ শুভলগনত

লগন উকলি গ'ল

টিলাই টিলাই ঘূৰি ফুৰে উলাহেৰে

নাহৰ ফুলে নুশুৱাই

এয়ে মোৰ শেষ গান

বল বল বল কৃষক শক্তি দল

সুৰৰে দেউলৰে ৰূপৰে শিকলি

বিশ্বৰ ছন্দে ছন্দে

আজি মন্দিৰ দুৱাৰ খোলা

তেজৰ বোলেৰ লিখি যাম ইতিহাস

হে বিপ্লবী বীৰ অধিনায়ক হে

মোৰ জীৱনৰ আকাশতে ইন্দ্ৰধনু গঢ়িম

আজলী ছোৱালী নানা ফুল তুলি

বিলতে হালিছে ধুনীয়া পদুমী

অ’ গুৰু মোৰ শংকৰ তৰিবৰ কিনো উপায়

নিছলা আইৰে আমি খাটি অসমীয়া

কাষতে কলচি লৈ

সখি হে কি কমে দুখৰে কথা

উটি যা ৰূপালী নাও

অ’ অসমীয়া ডেকা দল ইত্যাদি।

   শিক্ষাৰ দিশত ৰাভা ডাঙৰীয়াই বৰ বেছি আগবাঢ়িব পৰা নাছিল। প্ৰাথমিক শিক্ষা বাংলাদেশৰ ঢাকা চহৰত সমাপ্ত কৰিছিল। কিন্তু উচ্চ শিক্ষা সাং কৰাৰ আগেয়েই পিতৃৰ মৃত্যু হোৱাত বিষ্ণু ৰাভা তেজপুৰত সম্বন্ধীয় লোকৰ ঘৰত থাকিবলৈ লয়। তেজপুৰ চৰকাৰী উচ্চতৰ মাধ্যমিক বিদ্যালয়ৰ পৰাই ১৯২৬ চনত তেখেতে হাইস্কুল শিক্ষান্ত পৰীক্ষাত উত্তীৰ্ণ হয়। পৰৱৰ্তী সময়ত স্বাধীনতা আন্দোলনৰ সৈতে জড়িত হোৱাৰ বাবে বৃটিছ বাহিনীৰ ৰোষত পৰি উচ্চ শিক্ষাত চেঁচা পানী পৰিল।

   

     অসমৰ ইমূৰৰপৰা পৰা সিমূৰলৈকে ঘূৰি ফুৰি সমাজিক কামত লিপ্ত থকা ৰাভাই কৃষক আৰু দৰিদ্ৰ শ্ৰেণীৰ মানুহক আৰ্থিক আৰু কায়িক ভাৱেও সহায় সহযোগ আগবঢ়াইছিল বুলি জনা যায়। তেখেত আছিল কমিউনিষ্টৰ ওপৰত বিশ্বাসী এজন বিপ্লৱী। আনকি ৰাজনীতিৰ পথাৰতো তেওঁ নিজৰ দক্ষতা দেখুৱাবলৈ সক্ষম হৈছিল।

     মহান শিল্পী গৰাকী দুৰাৰোগ্য ৰোগত আক্ৰান্ত হৈ পৰলোকপ্ৰাপ্তি ঘটে ১৯৬৯ চনৰ ২০ জুন তাৰিখে। তেখেতৰ কৰ্মৰাজীক জীয়াই ৰাখিবলৈ আজিও সেয়ে তেখেতৰ মৃত্যুৰ দিনটো উদযাপন কৰা হয়। উদযাপনৰ জৰিয়তে তেখেতক জনোৱা হয় শ্ৰদ্ধা। 

     আমি কেৱল তেখেতৰ প্ৰতিচ্ছবিত মাল্যাৰ্পণ কৰি, বন্তি প্ৰজ্বলন কৰি স্মৰণ কৰি ক্ষান্ত থাকিলেই নহ'ব। আমি ইয়াৰ সমান্তৰালভাৱে তেখেতৰ সৃষ্টিৰাজিও সংৰক্ষণ কৰিবলৈ প্ৰয়াস কৰিব লাগিব। সেয়ে বৰ্তমান সময়তো তেওঁৰ সম্পৰ্কে নিৰ্মোহ বিশ্লেষণৰ প্ৰয়োজনীয়তা আহি পৰিছে। অসমৰ নতুন প্ৰজন্মই যাতে পাহৰি নাযায় আৰু তেওঁৰ সম্পৰ্কে যাতে ভালদৰে জানে সেই ব্যৱস্থা অগ্ৰজ সকলে কৰিব লাগিব। তেতিয়াহে ৰাভা দিৱস উদযাপন কৰাৰ সাৰ্থকতা থাকিব।

থুলমূল কৈ ৰাভা দেৱৰ সম্পৰ্কে লিখি 'ৰাভা দিৱস'ৰ শুভক্ষণত তেখেতলৈ শ্ৰদ্ধাঞ্জলি অৰ্পণ কৰিলোঁ।

লেখক : দুদুল সোণোৱাল। শিক্ষক।

হাঁহখাটী উচ্চ মাধ্যমিক বিদ্যালয় ।

🍒🍒🍒🍒🍒🍒🍒🍒🍒🍒🍒🍒🍒🍒🍒🍒🍒