আকৌ বহাগ আহিবনে ?

আকৌ বহাগ আহিবনে?

ইয়াত আকৌ বসন্ত আহিব নে ?

জীৱনৰ লঠঙা ডালত পাখি মেলি নকৈ

গজি উঠিবনে আশাৰ কিশলয় !

মানুহৰ মন প্ৰেমত উদ্বেলিত কৰি..!

ফাগুনৰ পৰা তোলৈ কিমান দূৰ বাট 

অ'  মোৰ বুকুৰ বহাগ ?

সৰাপাতবোৰ গচকি সপোনক লৈ যাম

এডেও দুডেও কৰি মোৰ উৰুখা পঁজালৈ ।

তই নিবিনাবি ফাগুন তোৰ মৃদু মলয়াৰ

পানচৈত উঠিয়ে কপৌফুলৰ মালা গাঁঠিম

আলফুলে গুজিবলে' চেনাইৰ পাজিসেঁৰীয়া খোপাত 

অ' মোৰ উতলা বসন্ত

ফাগুনৰ পৰা তোলৈ কিমান দূৰ বাট ?

পছোৱাই কাণে কাণে ফু মাৰি কয়

আইৰ শোঁকৰ সৰাপাত পচিলেই হেনো

তই আহিবি বৰদৈচিলা হৈ

নদাই ভদাইৰ খামিডাঠ বুকুখনত প্ৰেমৰ

নূপুৰ পিন্ধায়... । অ' মোৰ উতলা বহাগ 

ফাগুনৰ পৰা তোলৈ কিমান দূৰ বাট ? 

আকৌ আহিবা বহাগ 

ফাগুনৰ বোকোচাত উঠি 

সৰাপাতৰ গুমগুমনি তোলি

কৃষ্ণচূড়াৰ ডাল পাতত পেখম ধৰি

মানুহৰ প্ৰাণে প্ৰাণে ফুলাই তুলিবলে' 

প্ৰেমৰ কুসুম বিশ্বাসৰ কুসুম

চৌদিশ সুবাসিত কৰি...।

+++++++++++++++++++++++++++++++

আবেলিৰ ৰং