শিক্ষানুষ্ঠানৰ উত্তৰণত শিক্ষকৰ ভূমিকা

       সাম্প্ৰতিক ক্ষণত শিক্ষাব্যৱস্হাৰ উত্তৰণত শিক্ষক, অভিভাৱক আৰু ছাত্ৰ-ছাত্ৰীৰ কৰণীয় দায়িত্ব  অপৰিসীম | শিক্ষানুষ্ঠানৰ এই তিনিকোনীয়া তৰপত সুন্দৰ সম্পৰ্কই ইয়াৰ উত্তৰণৰ ঘাই চাবিকাঠি | সে়য়ে বিদ্যালয় এখনৰ      প্ৰধান বা শিক্ষকবৃন্দই বিষয়টোৰ ওপৰত দায়িত্ব আৰোপ কৰা প্ৰয়োজন| শিক্ষকসকল হ'ল ছাত্ৰ-ছাত্ৰীৰ পথপ্ৰদৰ্শক ব্যক্তি আৰু পৰামৰ্শদাতা | মাৰ্জিত সাজ-পোছাকৰ লগতে আচাৰ-আচৰণ, মাৰ্জিত ব্যৱহাৰ, খোজ-কাটল, কথা-বাৰ্তা আদিৰ ক্ষেত্ৰত শিক্ষকসকল সদাসচেতন হোৱাটো একান্তই বান্চনীয়| বিদ্যালয়ৰ পৰিৱেশ ৰচনাত শিক্ষকসকলৰ ভূমিকা অন্যতম| ইয়াৰ সমান্তৰালভাৱে আহি পৰে অভিভাৱকৰ দায়িত্বৰ  কথা | বিদ্যালয়ৰ প্ৰতিটো সহ-বিদ্যায়তনিক কাৰ্যসূচীৰ লগত অভিভাৱকক জড়িত কৰোৱাব লাগে | বহু অভিভাৱক আছে -তেখেতসকল যথেষ্ট অভিজ্ঞতাৰে পুষ্ট | তেনেধৰনৰ সমাজৰ সম্পদ সদৃশ ব্যক্তিৰ স'তে সুম্পৰ্ক গঢ়ি বিদ্যালয়খনৰ উৎকৰ্ষ সাধনৰ ক্ষেত্রত দিহা-পৰামৰ্শ আৰু কাম-কাজ কৰাই লব পাৰি |

           শিক্ষা ব্যৱস্হাটো উন্নতি ঘতাবৰ বাবে শিক্ষকৰ ত্যাগ অনস্বীকাৰ্য | বিশেষকৈ অভিভাৱক, ছাত্ৰ-ছাত্ৰী, শিক্ষক-শিক্ষয়ত্ৰী আৰু সমাজৰ সম্পদ সদৃশ ব্যক্তিৰ স'তে সুসম্পৰ্ক গঢ়ি তোলাৰ ক্ষেত্ৰত প্ৰধান  শিক্ষকজনৰ গুৰু দায়িত্ব আছে আৰু ই এটা সুন্দৰ নিদৰ্শন হিচাবে বিবেচিত |
             ছাত্ৰ-ছাত্ৰীক দিনটোৰ ছয় সাত ঘন্টাহে শিক্ষকসকলে সান্নিধ্যত পাই | গতিকে এইখিনি সময়তে যিমান দূৰ সম্ভৱ তেওঁলোকৰ জীৱনত প্ৰয়োজনীয় গুনগত আৰু ফলপ্ৰসু শিক্ষা প্ৰদানত শিক্ষকসকল আগ্ৰহান্বিত তথা সুপ্ৰয়াস কৰা উচিত |
             মৰম-স্নেহেৰে, সুপৰামৰ্শৰে, নজনাজনক নাহাঁহি "চেষ্টা কৰিবা" বুলি প্ৰশংসাসূচক মন্তব্য প্ৰদানেৰে ছাত্ৰ-ছাত্ৰীসকলক অধ্যয়নত উৎসাহ আৰু প্ৰেৰনা যোগাব লাগে | তেতিয়াহে তেওঁবিলাকৰ মনত শিক্ষকৰ সম্পৰ্কে সদ্ভাৱ অটুট থাকিব লগতে শিক্ষা অৰ্জনত অনুপ্ৰেৰণা লাভ কৰিব |
             অভিভাৱকসকলে তেওঁলোকৰ নিজ সন্তানক শিক্ষকসকলতকৈ জীৱনৰ সৰহভাগ সময় কাষত পায় | সেয়েহে অভিভাৱক সকলক এইক্ষেত্ৰত অধিক সজাগ-সচেতন কৰাব পাৰিব লাগিব | সজাগ কৰাব লাগিব প্ৰদত্ত বিদ্যালয়ৰ শিক্ষকসকলে | নিজ সন্তানৰ পঢ়াৰ সম্পৰ্কে খা-খবৰ লবলৈ তেওঁলোকক বাধ্য কৰাব লাগে | গৃহকৰ্মসমূহ ল'ৰাটোৱে কৰিছে নাই, মনোযোগ দিছে নাই (?) আদিবোৰৰ ক্ষেত্ৰত মন-কান দিবৰ বাবে অভিভাৱকক সোৱৰাই দিব লাগে | এই কাৰ্যই বিদ্যালয়ৰ উত্তৰণত সহায়ক হ'ব | যিহেতু কোৱা হয় -"ঘৰখনেই শিশুৰ শিক্ষাৰ প্ৰথম ঢাপ |" সেই দিশৰ পৰা অভিভাৱকসকল সক্ৰিয় হ'বই লাগিব | আনকি তেওঁলোকৰ কথা-বাৰ্তা, আচাৰ-ব্যৱহাৰ আদিও ৰুচিসন্মত হোৱাৰ দৰকাৰ |
             যি কি নহওঁক থোৰতে ক'ব লাগিব যে শিক্ষানুষ্ঠানৰ উন্নয়নৰ ঘাই শিপাডাল -শিক্ষক,অভিভাৱক আৰু ছাত্ৰ-ছাত্ৰীৰ দ্বাৰা সৃষ্ট | এই শিপাৰ সাৰ-পানী হ'ল সুসম্পৰ্ক আৰু সমন্বয় | একতাই পৰম বল - উক্তিষাৰি সাৰোগত কৰি আটাইয়ে আগুৱাই গ'লে অসমীয়া বিদ্যালয়ৰ উন্নতি নহৈ নোৱাৰি | গতিকে আটাইয়ে মুষ্টিবদ্ধ দুহাত প্ৰসাৰিত কৰি দিওঁ আহক, সন্মুখলৈ ফলপ্ৰসু তথা গুণগত এক শিক্ষাৰ গণ্ডীৰলৈ...|
              লেখক পৰিচিতি: দুদুল সোনোৱাল |
              গাওঁ : আৰৈমুৰীয়া, ছৈখোৱা ঘাট
               জিলা : তিনিচুকীয়া, অসম |
                Email : dudulsonowal32@gmail.com