প্ৰাকৃতিক দুৰ্যোগ আৰু অসম

প্ৰাকৃতিক দুৰ্যোগ কি ?

     প্ৰাকৃতিক দুৰ্যোগ হ'ল প্ৰকৃতিৰ জৰিয়তে স্বয়ংক্ৰিয় ভাৱে সংঘটিত হোৱা একপ্ৰকাৰৰ দুৰ্যোগ বা ঘটনা। মানুহৰ হঠকাৰি চিন্তাৰে কৰা কিছুমান ধ্বংসকাৰী কাৰ্যৰ ফলত প্ৰকৃতিয়ে ভাৰসাম্য হেৰুৱাই বিভিন্ন তাণ্ডৱৰ সৃষ্টি কৰে। বানপানী , ভূঁইকপ আদি তাৰেই অন্যতম জ্বলন্ত উদাহৰণ। সংক্ষিপ্ত ভাৱে প্ৰকৃতিৰ এই তাণ্ডৱকেই মানুহৰ বাবে বিপজ্জনক প্ৰাকৃতিক দুৰ্যোগ বুলি অভিহিত কৰা হয়। প্ৰাকৃতিক দুৰ্যোগ প্ৰকৃতিৰ স্বাভাৱিক অৱস্থাৰ ব্যতিক্ৰম ৰূপ। পৃথিৱীৰ প্ৰতিটো চুকে কোণে সময়ৰ ধামখুমীয়াত পৰি প্ৰকৃতিৰ নিজস্ব ৰূপ হেৰুৱায় পেলাইছে। পূৰ্বৰ অটব্য অৰণ্যৰে ভৰপূৰ হাবি জংগল আজি মানুহৰ নিষ্ঠুৰ হাতোৰাত ধ্বংস হৈ ডাঙৰ ডাঙৰ অট্টালিকা আবাসেৰে ভৰি পৰিল। বিভিন্ন কল কাৰখানা আদি নিৰ্মাণেৰে পৰিৱেশৰ ভাৰসাম্য বিনষ্ট কৰি প্ৰাকৃতিক দুৰ্যোগ নমাই আনিলে মানুহ নামৰ প্ৰাণীবিধে। যাৰফলত পৰিৱেশৰ বায়ু প্ৰদূষিত হ'ল, নিজম পৰিৱেশ কোলাহল পূৰ্ণ হ'ল, মাটি, পানী প্ৰদূষিত হ'ল আৰু ইয়াৰ লগে লগে বতৰৰ তাৰতম্য ৰূপ প্ৰতিফলন ঘটিল প্ৰাকৃতিক দুৰ্যোগ হিচাপে। 

   প্ৰাকৃতিক দুৰ্যোগৰ বিৱৰণ

    বানপানী, ভূঁইকপ, ভূমিস্খলন গঢ়াখহনীয়া, ধুমুহা,প্ৰৱল বতাহ আৰু শিলাবৃষ্টি আদি হ'ল প্ৰাকৃতিক দুৰ্যোগ। বিভিন্ন কাৰকৰ ফলত পৰিৱেশৰ স্বাভাৱিক অৱস্থাৰ পৰিবৰ্তন হৈ অস্বাভাৱিক ৰূপে গা কৰি উঠা ই এটা প্ৰকৃতিৰ অন্য ৰূপ। প্ৰকৃতিয়ে মানুহক স্বমহিমাৰে প্ৰদান কৰা সামগ্ৰী সমূহ প্ৰয়োজনতকৈ অধিক পৰিমাণে আজুৰি আনি মানুহে নিজৰ লাস বিলাসৰ নামত অপব্যয় কৰি প্ৰকৃতিৰ পৰিকাঠামো ধ্বংস কৰা পৰিলক্ষিত হৈছে। আজি অটব্য অৰণ্যৰ গছ গছনি বিভিন্ন আচবাব প্ৰস্তুতকৰণৰ বাবে, আবাস গৃহ সঁজাৰ বাবে, বিভিন্ন ৰোগৰ ঔষধৰ বাবে, সুগন্ধি দ্ৰব্য প্ৰস্তুত কৰিবৰ বাবে মানুহে কাটি চফা কৰি পেলাইছে। ফলশ্ৰুতিত মানুহে প্ৰকৃতিৰ ৰোষত পৰিছে। আৰু এনেদৰে যদি প্ৰকৃতিৰ ধ্বংস কাৰ্য অব্যাহত থাকে তেন্তে এদিন আমাৰ মৰমৰ তথা সৌন্দৰ্যৰে পূৰ্ণ পৃথিৱীখন আমি যে হেৰুৱাব লগা হ'ব সেয়া ধ্ৰুৱসত্য।

     মানুহৰ অমনোযোগিতা আৰু অসাৱধানতাৰ বাবে আজি নদীয়ে নিজৰ স্বাভাৱিক ভাৰসাম্য হেৰুৱাই পেলাইছে। নদীৰ পানী বিভিন্ন দিশত সিঁচৰিত হৈ পৰিছে। মানুহে ব্যৱহাৰ কৰা প্লাষ্টিক সামগ্ৰী সমূহ নদীত পেলায় দিয়াৰ ফলত, আন সহজে নপচা সামগ্ৰী সমূহ নদীৰ পানীত পেলোৱাৰ ফলত নদীৰ ভাৰসাম্যতা নষ্ট হৈছে, নদীৰ গভীৰতাত আঘাত হানিছে।যাৰ ফলত অলপ বৰষুণতে নদী ওফন্দি উঠি বানপানীৰ দৰে দুৰ্যোগ নমাই আনিছে । 

    একেদৰে জধেমধে মানুহে গছ গছনি কটাৰ ফলত বতৰৰ তাৰতম্যতাত প্ৰত্যক্ষ প্ৰভাৱ পৰিছে। বিজ্ঞানে কয় যে গছ গছনি প্ৰভাৱৰ ফলত অধিক বৃষ্টিপাত হয়। যদি গছ গছনি নাথাকে বা পৰিসংখ্যা হ্ৰাস পায় তেন্তে বৰষুণৰ পৰিমাণ হ্ৰাস পাব। ইয়াৰ কাৰণ হৈছে জলবায়ুত কাৰ্বন ডাই অক্সাইড গেছৰ পৰিমাণ বৃদ্ধি ঘটা। অৰ্থাৎ গছ গছনি নাথাকিলে জলবায়ুত কাৰ্বন ডাই অক্সাইড গেছৰ পৰিমাণ বৃদ্ধি পায় ফলত জলবায়ু প্ৰদূষিত হয় আৰু ভাৰসাম্যতাত প্ৰভাৱ পৰে। 

      বৃহৎ বৃহৎ আকাৰৰ জলবিদ্যুৎ প্ৰকল্পৰ নিৰ্মাণৰ ফলত পৃথিৱীৰ বহন ক্ষমতাৰ ক্ষেত্ৰত বাৰুকৈয়ে আঘাত হানিছে। ভূগৰ্ভৰ পৰা প্ৰাকৃতিক গেছ নিষ্কাষণ, সোণ , কয়লা, বিভিন্ন ধাতু নিষ্কাষণৰ ফলত ভূ-গৰ্ভৰ প্ৰায় উদং অৱস্থাৰ সৃষ্টি হৈছে। এই দ্ৰব্য খননকাৰ্যৰ ফলত ভূ-পৃষ্ঠৰ তলিত সুৰুঙাৰ সৃষ্টি হৈছে আৰু অজনস্তৰত প্লেটৰ হেৰফেৰ ঘটাত ভূমিকম্পৰ সৃষ্টি হৈছে। সন্দেহ নাই যে অনাগত দিনত এনে এক প্ৰৱল ভূমিকম্প হ'ব পাৰে যিয়ে মানুহৰ অহংকাৰক চূৰ্ণ বিচূৰ্ণ কৰি ঠিতাতে সকলো শেষ কৰি দিব। 

 অসম আৰু প্ৰাকৃতিক দুৰ্যোগ

    ভাৰতবৰ্ষৰ ৰাজ্য বিলাকৰ ভিতৰত অসম হয়তো আটাইতকৈ বেছি প্ৰাকৃতিক দুৰ্যোগৰ সন্মুখীন হোৱা ৰাজ্য। অসমৰ জনসাধাৰণ বানপানী, ভূঁইকপ, ভূমিস্খলন, গঢ়াখহনীয়া, শিলাবৃষ্টি,প্ৰলয়ংকাৰী ধুমুহা বতাহ আদিৰ লগত চিৰলগৰীয়া বুলি ক'লেও হয়তো অত্যুক্তি কৰা নহ'ব। সেয়ে অসমক ভূকম্পপ্ৰৱন এলেকা হিচাপে চিহ্নিত কৰা হৈছে। ভাৰতৰ বিভিন্ন ৰাজ্যবিলাকৰ ৰেহৰূপ নিৰীক্ষণ কৰি চাৰিটা জ'নত বিভক্ত কৰা হৈছে। জ'ন -৫ ত  সৰ্বাধিক ভূমিকম্প হোৱা অঞ্চল সমূহ অন্তৰ্ভুক্ত কৰা হৈছে। এই জ'নত প্ৰায় ৮ৰ পৰা ৯ প্ৰাৱল্যৰ ভূমিকম্প হোৱাৰ সম্ভাৱনা ব্যক্ত কৰা হৈছে। অন্তৰ্ভুক্ত ৰাজ্য বিলাক হ'ল ক্ৰমে কাশ্মীৰৰ অঞ্চল, পশ্চিম আৰু মধ্য হিমালয়, উত্তৰ আৰু মধ্য বিহাৰ, উত্তৰ পূব ভাৰতীয় অঞ্চল, আন্দামান নিকোবৰ দ্বীপপুঞ্জ আদি । জ'ন-৪ ত অন্তৰ্ভুক্ত ৰাজ্য বিলাক হ'ল জম্মু আৰু কাশ্মীৰ, লাডাখ, হিমাচল প্ৰদেশ, উত্তৰাখণ্ড,চিকিম, দিল্লী আদি। জ'ন ৩ ত অন্তৰ্ভুক্ত ৰাজ্য বিলাক হ'ল ক্ৰমে চেন্নাই , মুম্বাই, কলকাতা, ভূৱনেশ্বৰ আদি ৰাজ্য। জ'ন-২ ৰ অন্তৰ্ভুক্ত হ'ল বাকী ৰৈ যোৱা আটাইবোৰ ৰাজ্য । 

      এই অধ্যয়নৰ পৰা ক'ব পৰা যায় যে উত্তৰ পূব অঞ্চল আটাইতকৈ বিপদজনক প্ৰাকৃতিক দুৰ্যোগৰ এলেকা। এনে বিপদজনক অৱস্থিতিৰ সম্পৰ্কে বিশদভাৱে জানিও চৰকাৰে অসমত বৃহৎ আকাৰৰ জলবিদ্যুৎ প্ৰকল্পৰ ৰূপায়ন কৰা কাৰ্য হঠকাৰি চিন্তাৰ বাদে অন্য একো নহয়।

      বানপানীৰ সমস্যা অসমৰ জনসাধাৰণৰ বাবে এক এৰাব নোৱৰা দুৰ্যোগ হিচাপে চিহ্নিত। প্ৰতি বছৰে অসমৰ মানুহে এই প্ৰাকৃতিক দুৰ্যোগৰ সন্মুখীন হ'ব লগা হয়। কৃষক ৰাইজে প্ৰতি বছৰে কৃষিৰ ক্ষেত্ৰত বৃহৎ লোকচানৰ সন্মুখীন হ'ব লগা হয়। হাজাৰ হাজাৰ বিঘা মাটিৰ খেতি বানপানীৰ কবলত পৰি অনিষ্ট সাধন হয় যাৰ ফলত কৃষকৰ লগতে চৰকাৰেও লোকচান ভৰিবলগীয়া  হয়।  তথাপিও অসম চৰকাৰে হওঁক বা ভাৰত চৰকাৰে হওঁক এই সমস্যাৰ স্হায়ী সমাধানৰ বাবে আজিও পদক্ষেপ হাতত লোৱা পৰিলক্ষিত নহ'ল।

   সামৰণি

    অদূৰ ভৱিষ্যতে অসম যে প্ৰাকৃতিক দুৰ্যোগৰ ক্ষেত্ৰত এতিয়াতকৈ অত্যধিক ভয়াবহ পৰিস্থিতিৰ সন্মুখীন হ'ব সেয়া পৰিৱেশৰ অৱস্থা পৰ্যবেক্ষণ কৰি ঠাৱৰ কৰিব পাৰি। ৰাজ্যখনৰ  থকা সাপেক্ষে চিন্তা ধাৰণা পৰিবৰ্তন কৰি সুদিন ঘূৰাই অনাৰ বাবে চৰকাৰে সময়োচিত সিদ্ধান্ত গ্ৰহণ কৰিব লাগিব। হ্ৰস্বম্যাদী আৰু দীৰ্ঘম্যাদী আচঁনি গ্ৰহণৰ জৰিয়তে অসমৰ প্ৰাকৃতিক দুৰ্যোগ মুখিমূৰ কৰিবলৈ চৰকাৰে অহোপুৰুষাৰ্থ প্ৰয়াস কৰিব লাগিব। 

     বিশ্বৰ প্ৰতিখন দেশেই প্ৰাকৃতিক দুৰ্যোগৰ পৰা ৰক্ষা পাবলৈ বিভিন্ন আচঁনি গ্ৰহণ কৰা পৰিলক্ষিত হৈছে যিটো পৃথিৱীবাসীৰ বাবে শুভ লক্ষণ বুলিব পাৰি। জলবায়ুৰ ভাৰসাম্য অটুট ৰাখিবৰ বাবে বৃক্ষৰোপণ কৰা হৈছে। বৃক্ষৰোপণ কাৰ্যসূচীৰ পৰিসৰ বৃদ্ধি ঘটাই গোলকীয় উষ্ণতাৰ হ্ৰাস কৰি জলবায়ুৰ ভাৰসাম্য ৰক্ষাত অৰিহণা আগবঢ়োৱাৰ ক্ষেত্ৰত সকলো ৰাষ্ট্ৰই সহযোগ কৰাৰ সময় সমাগত। পৰিশেষত কও আমি আমাৰ বাবেই এখন প্ৰাকৃতিক দুৰ্যোগ মুক্ত ধৰণী সজাই তোলাৰ অন্ত্যন্ত প্ৰয়োজন আছে।                   

বি.দ্ৰ.: প্ৰতিচ্ছবি সমূহ ইণ্টাৰনেটৰ পৰা সংগৃহীত।

  ঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁঁ