বিশ্বত নাৰীৰ অৱস্থান আৰু অৱদান

বিশ্বত নাৰীৰ অৱস্থান

        আমি সকলোৱে দেখি আহিছোঁ বা পঢ়িছোঁ নাৰীৰ অৱস্থান কি অৱস্থাত আছিল আৰু কি হৈ আছে। বিশ্বৰ প্ৰতিখন দেশৰ , প্ৰতিখন ঠাইৰ নাৰীৰ সম্পৰ্কে অধ্যয়ন কৰিলে উলাই পৰে যে নাৰী আজি অৱলা নহয়, নাৰী দুৰ্বল নহয়। নাৰীয়ে অতীজৰে পৰা নিজৰ দক্ষতা, নিজৰ বুদ্ধিমত্তা , জ্ঞানৰ গভীৰতা আদি স্ব মহিমাৰে নিজক পৰিচয় দি আহিছে। বিভিন্ন কৰ্ম ক্ষেত্ৰত নাৰীয়ে পুৰুষৰ সমানে আগুৱাই যাব সক্ষম হৈছে। কি বিজ্ঞান,কি ৰাজনীতি , কি মহাকাশ সকলোতে নাৰীৰ অৱস্থিতি বিদ্যমান। অৰ্থাৎ নাৰীক অৱলা বুলি অৱজ্ঞা কৰাটো মুৰ্খামী তথা ধুৰন্ধৰৰ বাদে অন্য একো নহয়। সেয়ে সৃষ্টিৰ সৈতে জড়িত থকা নাৰী মহিমাময়ী আৰু সন্মানীয় আৰু সমাজৰ এটা অবিচ্ছেদ্য অঙ্গ হিচাবে পৰিগণিত।

   ইতিহাসৰ পাতত নাৰী 

    ইতিহাসৰ পাত লুটিয়াই চালে দেখা যায় নাৰীৰ অৱস্থান পূৰ্বতে বৰ সুখজনক নাছিল। বৈদিক যুগত নাৰীৰ স্থান উচ্চ আছিল। পুৰুষতান্ত্ৰিক সমাজত বৈবাহিক ক্ষেত্ৰত, শৈক্ষিক ক্ষেত্ৰত নাৰীয়ে অধিকাৰ সাব্যস্ত কৰিব পাৰিছিল। কিন্তু পৰৱৰ্তীকালত এই অধিকাৰত ঘূণে ধৰিছিল আৰু নাৰীৰ অৱস্থান অৱনতি হৈছিল। একেদৰে বৌদ্ধ যুগতো নাৰীৰ অৱস্থান একেবাৰে অৱদমিত হৈছিল। আনকি নাৰীক এই সময়ছোৱাত পণ্যৰ সদৃশ জ্ঞান কৰিছিল। অৱশ্যে মৌৰ্য যুগত নাৰীৰ সামাজিক, অৰ্থনৈতিক আৰু শৈক্ষিক ক্ষেত্ৰত অধিকাৰ প্ৰদান কৰা হৈছিল। গুপ্ত যুগৰ সময়ছোৱাতো বৰ ভাল নাছিল। 

     সেয়েহে নাৰীয়ে স্বাধীনোত্তৰ বা স্বাধীনতা আন্দোলনৰ সময়ছোৱাত নাৰী অধিকাৰৰ বাবে যুঁজিবলৈ আৰম্ভ কৰিছিল। ভাৰতৰ বাদে বিভিন্ন দেশৰ নাৰীয়ে প্ৰায় ১৯৫০ চনৰ পূৰ্বে নাৰীৰ অধিকাৰ বিচাৰি আন্দোলন আৰম্ভ কৰিছিল। আমেৰিকা যুক্তৰাষ্ট্ৰ, ছোভিয়েট ৰুছিয়া আদি দেশৰ নাৰীয়েও আন্দোলনৰ অব্যাহত ৰাখিছিল। তাৰ ফলশ্ৰুতিত ১৯১৯ চনত সংযুক্ত যুক্তৰাষ্ট্ৰৰ সংবিধানৰ ১৯ নং সংশোধনী ঘটাই নাৰীক ভোটাধিকাৰ প্ৰদান কৰা হৈছিল। 

        ভাৰতবৰ্ষত নাৰীৰ অৱস্থান পূৰ্বৰ পৰাই সহনীয় আছিল। অৰ্থাৎ নাৰীক ভাৰতীয় সমাজত যথেষ্ট উচ্চ স্হান দিয়া হৈছিল যদিও ঠাই ভেদে নাৰীক নিৰ্যাতন নকৰাও নহয়। 

       ভাৰতত নাৰীয়ে ৰাজনৈতিক অধিকাৰো লাভ কৰিছিল। সংবিধানে ১৮ বছৰ বয়সৰ ওপৰৰ সকলো পুৰুষ মহিলাকে ভোটাধিকাৰ প্ৰদান কৰিছে। ইয়াৰ জৰিয়তে বুজা যায় যে ভাৰতত নাৰীয়ে সমঅধিকাৰ পূৰ্বৰ পৰাই ভোগ কৰি আহিছে। কিন্তু কিছুমান ক্ষেত্ৰত নাৰীয়ে অধিকাৰ নাপাইছিল। ৰাজনীতিৰ ক্ষেত্ৰত, চাকৰিৰ ক্ষেত্ৰত, বিভিন্ন চলচ্চিত্ৰ নিৰ্মাণৰ ক্ষেত্ৰত নাৰীয়ে পুৰুষৰ সমানে আগুৱাই যাব পাৰিলেও সম অধিকাৰ প্ৰদান কৰা হোৱা নাছিল। ভাৰতীয় সমাজ ব্যৱস্থাত নাৰীক কিছু ক্ষেত্ৰত ভাগ ল'বলৈ নিদি তলতীয়া কৰি ৰাখিবলৈ প্ৰচেষ্টা কৰা হৈছিল। অৱশ্যে আজি নাৰীক ভাৰতীয় সমাজত সন্মান, শ্ৰদ্ধা আৰু গুৰুত্বপূৰ্ণ অংশ হিচাপে বিবেচিত কৰা হয়।

      যুগে যুগে নাৰীৰ কৃতিত্ব

      ইতিহাসৰ পাতত নাৰীৰ কৃতিত্ব জলজল পটপটকৈ আজিও জিলিকি আছে। যুগোশ্লেভিয়াৰ মহিমামণ্ডিত মাদাৰ টেৰেছাৰ কথা কোনে নাজানে। ভাৰতৰ প্ৰতিজন ব্যক্তিৰ মনত হয়তো মাদাৰ টেৰেছাৰ কাৰ্যৰ অৱদানৰ বিৱৰণ সঞ্চিত হৈ আছে। অসমৰ কলকাতা ,মুলাগাভৰু , চন্দ্ৰপ্ৰভা শইকীয়ানী অসমৰ গৌৰৱ।  লক্ষ্মীবাই, ভগিনী নিবেদিতা,সৰলা দেৱী চৌধুৰী আদিৰ দৰে জন নাৰীৰ অৱদান কোনো নুই কৰিব নোৱাৰে। পুৰুষৰ সমানে আগুৱাই গৈ স্বাধীনতা আন্দোলনত অংশগ্ৰহণ কৰি নাৰীৰ মৰ্যদা অক্ষুণ্ণ ৰাখি থৈ গৈছে। 

     আয়াৰলেণ্ডত জন্ম গ্ৰহণ কৰা মাৰ্গাৰেট এলিজাবেথ নবোল নাৰীৰ মাজত জাগৰণ সৃষ্টিত যি অৱদান আগবঢ়াই গৈছে তাক পাহৰিব নোৱাৰি। লণ্ডনৰ এনি বেচান্তে আছিল একাধাৰে লেখক, চিন্তাবিদ, স্বাধীনতা যুঁজাৰু আৰু সমাজ সেৱিকা। যিয়ে নিজৰ সৎকৰ্মৰ জৰিয়তে বিশ্বৰ ইতিহাসত নিজৰ নাম সোণালী আখৰেৰে খোদিত কৰি নাৰীৰ অৱস্থান উচ্চ আসনত অধিষ্ঠিত কৰি থৈ যাবলৈ সক্ষম হৈছে। এনে বহু নাৰীৰ উদাহৰণ আছে যিয়ে সমাজৰ বাবে মুল্যৱান তথা প্ৰভূত পৰিমাণে অৱদান আগবঢ়াই সমাজৰ লগতে নাৰীক আগবঢ়ায় থৈ গৈছে।

    

    বৰ্তমান সময়ত নাৰী

    

     ভাৰতীয় মূলৰ মহিলা কল্পনা চাওলা , সুনীতা উইলিয়ামচ আদি আজি বিশ্বৰ ভিতৰতে চিনাকি নাম। নিজৰ অধ্যৱসায়, শিক্ষা, কাৰ্য তথা জ্ঞানৰ ফলত এওঁলোকক আজি বিশ্বৰ সকলোৱে এগৰাকী বিখ্যাত নাৰী হিচাপে চিনি পায়। 

কল্পনা চাওলা আছিল ১৯৯৭ চণত নাছাৰ জৰিয়তে মহাকাশত অৱততৰণ কৰা প্ৰথম গৰাকী বিশ্বৰ নাৰী ।  বৰ্তমান সময়ত বিভিন্ন ক্ষেত্ৰত নাৰীয়ে পুৰুষৰ সমানে আগুৱাই যাব সক্ষম হৈছে। ৰাজনীতিৰ ক্ষেত্ৰত, সামাজিক ক্ষেত্ৰত, সেৱাৰ ক্ষেত্ৰত নাৰীয়ে যিমতে আগবাঢ়ি যাব সক্ষম হৈছে তাক পৰিলক্ষিত কৰি নাৰীক কেতিয়াও কোনোৱেও অৱলা জ্ঞান বা অৱজ্ঞা কৰিব নোৱাৰে। নাৰীৰ যি বিচাৰ ক্ষমতা, যি বুদ্ধি বৃত্তি আছে তাক সৎকামত খটুৱাই নাৰীৰ লগতে গোটেই সমাজখনক আগুৱাই নিয়াত সহযোগ কৰাৰ সময় সমাগত।

    সামৰণি

    ইতিহাসৰ পৰা বুজা গ'ল যে নাৰীয়ে ইচ্ছা কৰিলে সৰগতো পুৰুষৰ সমানে ঘৰ সাজিব পাৰে। যদি নাৰীক সকলো পুৰুষে সমমৰ্যদা দিলেহেঁতেন তেন্তে নিশ্চয় পৃথককৈ 'নাৰী দিৱস' প্ৰয়োজন নহ'ল হেঁতেন। আজি নাৰী বিভিন্ন কৰ্মৰে উদভাসিত , বিভিন্ন উদ্ভাৱনৰে জড়িত, বিভিন্ন চিন্তাৰ অধিকাৰী হৈয়ো যেন কৰবাত কিবা এটাৰ ক্ষেত্ৰত স্বাধীন নহয় ঠিক তেনেধৰণৰ অনুভৱ এটাই মনত আঘাত কৰি যায়।  যিয়েই নহওঁক এই সামান্য লেখাৰ জৰিয়তে 'নাৰী দিৱস' ৰ শুভ ক্ষণত সকলো আই সম নাৰীকেই মোৰ তৰফৰ পৰা শুভেচ্ছা জনালোঁ। অনাগত দিনত নাৰীৰ চিন্তাৰ জৰিয়তে সৃষ্টি হঁওক নতুনত্ব, সমাজৰ উত্তৰণৰ নিমিত্তে উচ্ছৰ্গিত হঁওক নাৰীৰ প্ৰবল ইচ্ছা শক্তি, সহনশীলতা,ধৈৰ্য, সাহস, সৃষ্টিশীলতা, মহানুভৱতাৰ গুণ ।  

     ফটো ইণ্টাৰনেটৰ পৰা সংগৃহীত।