পদিনা আৰু ইয়াৰ ঔষধি গুণ

পদিনাৰ বিৱৰণ:

     পদিনা এবিধ ঘাঁহ জাতীয় সুগন্ধিযুক্ত উদ্ভিদ। পদিনা অসমীয়া সমাজত চাটনি আৰু শাক হিচাপে ব্যৱহাৰ কৰা হয়। ই এবিধ ঔষধি গুণ সম্পন্ন উদ্ভিদ। অসমৰ সকলো ঠাইতে পদিনা পোৱা যায়। বিশেষকৈ কিছু ছাঁ পৰা আৰু ওখ সাৰুৱা মাটিত পদিনা উৎপাদন হয়। পদিনাৰ পাত ২-২•৫ ছেণ্টিমিটাৰ দীঘল আৰু ১-২ ছেণ্টিমিটাৰ পৰ্যন্ত বহল হয়। পদিনাৰ গা গছৰ ৰং ঈষৎ বেঙুনীয়া । পাতৰ বৰণ পাতল সেউজীয়া আৰু ফুলৰ বৰণো বেঙুনীয়া ৰঙৰ হয়। পদিনাক বিভিন্ন নামেৰে জনা যায়।

    

পদিনাৰ উপলব্ধতা :

      অসমৰ প্ৰতিটো চুকে কোণে পদিনাৰ অৱস্থিতি পৰিলক্ষিত হয়। চুবুৰীয়া ৰাজ্য অৰুণাচল প্ৰদেশ মেঘালয় আদি ঠাইত পদিনা উপলব্ধ। অৱশ্যে বিশ্বৰ বহু স্থানত পদিনা পোৱা যায়। এছিয়া মহাদেশৰ পশ্চিম আৰু মধ্য অঞ্চলত, পূব ছাইবেৰিয়া আৰু আমেৰিকাত, ইউৰোপ মহাদেশৰ নাতিশীতোষ্ণ অঞ্চলত পদিনা উপলব্ধ হয়। 

পদিনাৰ গুণাগুণ :

     পদিনা এবিধ ঔষধি গুণসম্পন্ন উদ্ভিদ। ইয়াক অসমৰ অসমীয়া সমাজত শাক হিচাপে আৰু চাটনি পিহি খাবৰ বাবে ব্যৱহাৰ কৰা দেখা যায়। অৱশ্যে সমগ্ৰ ভাৰততে ইয়াৰ গুৰুত্বতা আছে। পদিনাৰ ঔষধি গুণ -- ** কলেৰা ৰোগৰ বাবে পদিনা উত্তম পথ্য। পদিনাৰ ৰস মৌ আৰু নেমুৰ ৰসৰ লগত খালে এই বেমাৰৰ পৰা মুক্ত হ'ব পাৰি। ** মানুহৰ দেহত হোৱা কৃমি পদিনাৰ ৰস খালে আঁতৰে। ** টাইফয়ইড, নিউম'নিয়া আদি হ'লে পদিনা পিহি খাব লাগে। ** পদিনা খালে জণ্ডিছ ৰোগৰ পৰা উপশম পাব পাৰি। ** খৰ খজুৱতি হ'লে পদিনাৰ ৰস লগালে আক্ৰান্ত স্হান উপশম ঘটে। ** অখাদ্য ভোজনৰ ফলত বা কিবা কাৰণত পেট ফুলিলে, আভোক অনুভৱ হ'লে পদিনা ৰসৰ সৈতে তুলসী ৰস, জালুক, আদা দি পানীত মিহলাই উতলাই খালে এই ৰোগ নিৰাময় হয়। ** দাঁতৰ আলু মচবুত হোৱাত পদিনাৰ পাতৰ ৰসে সহায় কৰে। ** পেটৰ বিষ ইয়াৰ ৰসে নাইকীয়া কৰে।

      

       পদিনাত থকা উপাদান : এক টেবুল চামুচ বা প্ৰতি ২-৩ গ্ৰাম পৰিমাণত --

*  পদিনাত শক্তি থাকে ২ কেলৰি ।

* পদিনাত প্ৰ’টিন  ১০০ মিলিগ্ৰাম ।

* কাৰ্ব'হাইড্ৰেট ৫০০ মিলিগ্ৰাম । 

*  ডায়েটেৰী ফাইবাৰ ৩০০ মিলিগ্ৰাম । 

*  প’টেচিয়াম ১৮ মিলিগ্ৰাম ।

*   ছ’ডিয়াম ১ মিলিগ্ৰাম ।

*   যথেষ্ট পৰিমাণে আইৰণ  ,কেলচিয়াম থাকে।

*  ভিটামিন-A, ভিটামিন- B, ভিটামিন-C, ভিটামিন- E আদি পদিনাত থাকে ৷ 

বৈজ্ঞানিক নাম ::

পদিনাৰ বৈজ্ঞানিক নাম হ'ল মেণ্ঠাআৰভেনচিছ (Mentha arvensis ) । ইয়াৰ বৰ্গ বা গোত্ৰ হ'ল      লেমিয়েলচ  (Lamiales) । ইংৰাজীত পদিনাক Field Mint বুলি কোৱা হয়। তদুপৰি Wild Mint বা Corn Mint বুলিও জনা যায়। 

       

    পদিনাৰ পৰা উৎপাদিত সামগ্ৰী ::  

     পদিনাৰ পৰা মানুহৰ বাবে প্ৰয়োজনীয় বিভিন্ন সামগ্ৰী উৎপাদন কৰা হয়। তাৰ ভিতৰত বিশেষকৈ সুগন্ধি দ্ৰব্য প্ৰস্তুত কৰা হয়। ইয়াৰোপৰি সুগন্ধি তেল, পিপাৰমেণ্ট, টুথপেষ্ট, মৰ্টন, চকলেট,চুয়িংগাম,বিষনাশক দ্ৰব্য, বাম,জেলি, চৰবত আদি প্ৰস্তুত কৰা হয়। মাংস আঞ্জাত পদিনা দিলে আঞ্জা বৰ সুস্বাদু হয়। 

     সামৰণি ::

    অধ্যয়নৰ পৰা বুজিব পৰা যায় যে পদিনা এবিধ অতি লাগতিয়াল উদ্ভিদ। পদিনাৰ ব্যৱসায়িক দিশ উজ্বল । বিভিন্ন উদ্যোগত ইয়াক বিক্ৰী কৰিব পাৰি। পদিনা সহজে উৎপাদন কৰিব পাৰি। সেয়েহে পদিনাৰ খেতি এক লাভজনক খেতি হিচাপে পৰিগণিত হৈছে। সকলো লোকে এনেয়ে পেলায় থোৱা মাটি চাহ কৰি ইয়াৰ খেতি কৰা উচিত।

      পদিনাত থকা গোন্ধৰ বাবে পৰুৱা,মাখি , আন পোক পতঙ্গ আদি আঁতৰি পলাই। গতিকে পদিনাই সুপৰিৱেশৰ ক্ষেত্ৰতো সহায় কৰে। আহক আমি সকলোৱে পদিনা লগাও আৰু চাটনি হিচাপে খাই নিজক নিৰোগী কৰি ৰাখোঁ।

********--------------*******"----------**********